حبيت لي بنت من العالم الراقي

ياهيييييييييييه ياللي تعيش العالم الراقي
وذوقك بكفه وذوق النـاس فـي كفـه
تكشخ بغالي ولا تنشـد عـن الباقـي
وأنـا حـدودي مـن البسـام للـدفـه
وتسكـن بفلـه وخدامـه وسـواقـي
عايـش حياتـك بعـز وجـاه ومرفـه
وأنا الضحيـه ورزقـي عنـد رزاقـي
وركـاب حظـي تقافـى عنـه منكفـه
لو ضاق جيبي وسيع البـال ماضاقـي
وان زاد حملي ضحكت وقلـت ياخفـه
مغنيني الله بطيـب الـراس وأخلاقـي
والرابح اللي يحصـل بالهـوى شفـه
والحسن طاغي وحكمه طاغيه طاغي
والشعب قلبي وانا محكوم فـي صفـه
مشتاق اشوفك ورب البيـت مشتاقـي
هات البشاير عسانـي فـارس الزفـه
ضايع بدونـك قبـل ماأبعثـر أوراقـي
ضياع ريكو علـى تقسيمـة الضفـه
ياعين حر(ن) على المشـراف تواقـي
صفة هدبها جموع جيـوش مصطفـه
في غيـم خـدك أخايـل كـل براقـي
لبـا جبينـك ولبـا الخـد والشـفـه
لون الشفايف وميضه داخـل أحداقـي
أصطب جيب(ن) كرس مع زوية اللفـه
جيتـك مغامـر وراس المـال خفاقـي
وظروف وقتـي عليـه اليـوم ملتفـه
هديتي لـك وكـاس الحـب وأشواقـي
وان جاك ضايق بصدرك طالبك ضفـه
حنـان قلبـك وخـل الباقـي الباقـي
دامك بكفه وبـاق النـاس فـي كفـه